Sunday, December 16, 2018
ချစ်တင်းနှီးနှောပြီးနောက် ရလာမယ့် ကျန်းမာရေးအကျိုးကျေးဇူးတွေ
ချစ်ကြတဲ့ ကိစ္စဟာ စိုးရိမ်စရာ မဟုတ်တဲ့အပြင် ချစ်ပြီးနောက်မှာလည်း ကျန်းမာရေးအကျိုးကျေးဇူးတွေ အများကြီး ရနိုင်ပါသေးတယ် သတို့သမီးလေးတို့ရေ
မင်္ဂလာဆောင်ဖို့ အားတတ်သရော ပြင်ဆင်ကြိုးပမ်းနေကြတဲ့ သတို့သားလောင်း၊ သတို့သမီးလောင်းလေးတို့ရဲ့ အတွေးထဲ မင်္ဂလာဦးည အတွေးတွေလည်း ပါနေမှာပဲနော်။ မင်္ဂလာဦးညကို ဘယ်လို ဖြတ်သန်းကြမလဲ၊ အဆင်ရောပြေပါ့မလားဆိုပြီး စိုးရွံ့စိတ် ကြောက်စိတ်တွေလည်း အနည်းနဲ့ အများရှိကြမှာပါ။
ချစ်ကြတဲ့ ကိစ္စဟာ စိုးရိမ်စရာ မဟုတ်တဲ့အပြင် ချစ်ပြီးနောက်မှာလည်း ကျန်းမာရေးအကျိုးကျေးဇူးတွေ အများကြီး ရနိုင်ပါသေးတယ် သတို့သမီးလေးတို့ရေ။ ဘယ်လောက်တောင်ကောင်းတဲ့အကျိုးကျေးဇူးတွေလဲဆိုတာ Marry ကပြောပြပေးမယ်နော်။
ကိုယ့်ကိုယ်ကို ပိုချစ်လာတယ်
မိမိကိုယ်မိမိချစ်ခင်မှု၊ လေးစားမှုတွေ ပိုလာပါတယ်။ အဲ့ဒါက ကိုယ်တိုင်အတွက်ရော ပတ်ဝန်းကျင်အတွက်ပါ ကောင်းတဲ့ ကိစ္စပါ။ ကိုယ့်ကိုယ်ကို လေးစားချစ်ခင်လာတော့ အကောင်းမြင်စိတ်တွေလည်း ပိုလာတာပေါ့။
စိတ်ဖိစီးမှုတွေ လျော့ကျစေတယ်
စိတ်ဖိစီးမှုတွေက ကိုယ့်ရဲ့ ကျန်းမာရေး၊ အောင်မြင်ရေးနဲ့ အလှအပတွေကို အဖက်ဖက်က လျော့ကျစေတဲ့ အရာပါ။ ချစ်တင်းနှီးနှောပြီးနောက်မှာတော့ သဘာဝအတိုင်းကိုပဲ စိတ်ဖိစီးမှုတွေ လျော့နည်းသွားပါတယ်တဲ့။
ကယ်လိုရီတွေ လောင်ကျွမ်းတယ်
ကယ်လိုရီတွေများနေတာက ကျန်းမာရေးကို ပြဿနာရှိစေပါတယ်။ ချစ်တင်းနှီးနှောခြင်းကတော့ ကိုယ်လက်လှုပ်ရှား လေ့ကျင့်ခန်းတွေနည်းတူ ကယ်လိုရီတွေကို လောင်ကျွမ်းစေနိုင်စွမ်း ရှိပါတယ်။
တွဲလက်တွေ ပိုခိုင်မြဲတယ်
အိမ်ထောင်ရေးသုခ ပြည့်ဝပြီး ပျော်ရွှင်ကြတဲ့ စုံတွဲတွေမှာ ကျန်းမာရေး၊ လူမှုရေးပြဿနာတွေ နည်းပါတယ်။ ကင်ဆာနဲ့ နှလုံးရောဂါလို ရောဂါတွေလည်း ဖြစ်နိုင်ခြေနည်းတာကြောင့်မို့ ဒီလင်ဒီမယား အိုအောင်မင်းအောင် ပေါင်းရပါစေ ဆိုတဲ့ ဆုလေးနဲ့ပြည့်နိုင်တဲ့ စုံတွဲတွေပါ။
နှလုံးကျန်းမာရေးကို ကောင်းစေတယ်
နှလုံးသားထဲကနေ ချစ်စိတ်တွေ စီးဆင်းလာတယ်လို့ ကဗျာတွေ စာတွေမှာ ဖတ်ဖူးတယ်မဟုတ်လား။ လင်မယားနှစ်ယောက် အိပ်ယာထဲမှာ ချစ်ကြတာကတော့ နှလုံးကျန်းမာရေးကို ပိုမိုကောင်းမွန်စေပါသတဲ့။
နှစ်နှစ်ခြိုက်ခြိုက် အိပ်ပျော်စေပါတယ်
ချစ်တင်းနှီးနှောပြီးနောက် လက်ငင်းခံစားရတဲ့ အကျိုးကျေးဇူးကတော့ နှစ်နှစ်ခြိုက်ခြိုက် အိပ်ပျော်တာပါပဲ။ နှစ်နှစ်ခြိုက်ခြိုက် အိပ်ပျော်ခြင်းက ကိုယ်ရော စိတ်ကိုပါ ကျန်းမာစေတဲ့ သော့ချက်တစ်ခုပါ။
Marry ရဲ့ စုံတွဲလေးတွေလည်း ချစ်ခြင်းရဲ့ နောက်ဆက်တွဲအကျိုးကျေးဇူးတွေကို ခံစားရလို့ ကျန်းမာပျော်ရွှင်တဲ့ နှစ်ကိုယ်တူဘဝလမ်းလေးကို လျှောက်လှမ်းနိုင်စေဖို့ ဆုတောင်းပေးလိုက်ပါတယ်နော်။
